Sir 38

1 ⲙⲁⲧⲁⲉⲓⲉ ⲡⲥⲁⲉ[ⲓⲛ ] ⲕⲁⲓ ⲅⲁⲣ ⲡϫⲟⲉⲓⲥ ⲡⲉⲛⲧⲁϥⲥⲟⲛⲧϥ 2 ⲉⲣⲉⲡⲧⲁⲗϭⲟ ⲅⲁⲣ ϩⲓⲧⲙ ⲡϫⲟⲉⲓⲥ ⲡⲛ[ⲟⲩ]ⲧⲉ ⲁⲩⲱ ϣⲁϥϫⲓⲧⲁⲉⲓⲟ ⲛⲑⲉ ⲛⲟⲩⲣⲣⲟ 3 ϣⲁⲣⲉⲧⲉⲡⲓⲥⲧⲏⲙⲏ ⲛⲟⲩⲥⲁⲉⲓⲛ ϫⲓⲥⲉ ⲛⲧⲉϥⲁⲡⲉ ⲁⲩⲱ ϣⲁⲩⲣϣⲡⲏⲣⲉ ⲙⲙⲟϥ ⲙⲡⲉⲙⲧⲟ ⲉⲃⲟⲗ ⲛϩⲛⲛⲟϭ 4 ⲁⲡϫⲟⲉⲓⲥ ⲥⲛⲧⲙⲡⲁϩⲣⲉ ⲉⲃⲟⲗ ϩⲙ ⲡⲕⲁϩ ⲁⲩⲱ ⲟⲩⲣⲱⲙⲉ ⲛⲥⲁⲃⲉ ⲙⲁϥⲙⲉⲥⲧⲱⲟⲩ 5 ⲙⲏ ⲛⲧⲁⲟⲩⲙⲟⲟⲩ ⲁⲛ ϩⲗⲟϭ ⲉⲃⲟⲗ ϩⲛ ⲟⲩϣⲉ ⲉⲧⲣⲉⲩⲉⲓⲙⲉ ⲉⲧⲉϥϭⲟⲙ 6 ⲁⲩⲱ ⲛⲧⲟϥ ⲡⲉⲛⲧⲁϥϯⲥⲃⲱ ⲛⲣⲣⲱⲙⲉ ⲉⲧⲣⲉⲩϫⲓⲉⲟⲟⲩ ϩⲛ ⲛⲉϥϣⲡⲏⲣⲉ 7 ⲁϥⲣⲡⲁϩⲣⲉ ⲛϩⲏⲧⲟⲩ ⲁϥϥⲓ ⲛⲛⲉⲩⲧⲕⲁⲥ 8 ⲉⲣⲉⲙⲡⲁⲥⲥⲟϭⲛ ⲛⲁⲧⲁⲙⲓⲉⲟⲩⲙⲓⲅⲙⲁ ϩⲛ ⲛⲁⲓ ⲁⲩⲱ ⲛⲛⲉⲛⲉϥϩⲃⲏⲩⲉ ⲱϫⲛ ϯⲣⲏⲛⲏ ⲉⲃⲟⲗ ϩⲓⲧⲟⲟⲧϥ ⲉⲧϩⲓϫⲛ ⲫⲟ ⲙⲡⲕⲁϩ 9 ⲡⲁϣⲏⲣⲉ ⲙⲡⲣⲟⲃϣⲕ ϩⲙ ⲡⲉⲕϣⲱⲛⲉ ⲁⲗⲗⲁ [ⲥⲟⲡⲥ ⲙⲡϫⲟⲉⲓ]ⲥ ⲁⲩⲱ ⲛⲧⲟϥ ⲉ[… ] ⲛⲁⲕ 10 [ⲥⲁ]ϩⲉ ⲉⲃⲟⲗ ⲙⲙⲟⲕ ⲙⲡⲛⲟⲃⲉ ⲁⲩⲱ ⲛⲅⲥⲟⲟⲩⲧⲛ ⲛⲛⲉⲕϭⲓϫ ⲁⲩⲱ ⲧⲃⲃⲟ ⲙⲡⲉⲕϩⲏⲧ ⲉⲛⲟⲃⲉ ⲛⲓⲙ 11 ϯ ⲛⲟⲩⲥϯⲛⲟⲩϥⲉ ⲙⲛ ⲟⲩⲣⲡⲙⲉⲉⲩⲉ ⲛⲥⲁⲙⲓⲧ ⲛⲅⲧⲁϣⲉⲧⲉⲕⲡⲣⲟⲥⲫⲟⲣⲁ ⲛⲑⲉ ⲛⲛⲉⲧⲉⲛⲥⲉϣⲟⲟⲡ ⲁⲛ 12 ⲛⲅϯⲙⲁ ⲛⲟⲩⲥⲁⲉⲓⲛ ⲕⲁⲓ ⲅⲁⲣ ⲡϫⲟⲉⲓⲥ ⲁϥⲥⲟⲛⲧϥ ⲙⲡⲣⲧⲣⲉϥⲟⲩⲉ ⲙⲙⲟⲕ ⲕⲁⲓ ⲅⲁⲣ ⲕⲛⲁⲣⲭⲣⲉⲓⲁ ⲛⲁϥ 13 ⲟⲩⲛⲟⲩⲟⲩⲟⲉⲓϣ ⲅⲁⲣ ⲉⲣⲉⲡⲥⲟⲟⲩⲧⲛ ϩⲛ ⲧⲉϥϭⲓϫ 14 ⲕⲁⲓ ⲅⲁⲣ ⲥⲉⲥⲟⲡⲥ ϩⲱⲟⲩ ⲙⲡϫⲟⲉⲓⲥ ϫⲉ ⲉϥⲉⲥⲟⲟⲩⲧⲛ ⲛⲁⲩ ⲙⲡⲉⲙⲧⲟⲛ ⲁⲩⲱ ⲡⲧⲁⲗϭⲟ ⲉⲧⲃⲉ ⲧⲉⲩϭⲓⲛⲱⲛϩ 15 ⲉⲣⲉⲡⲉⲧⲣⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡⲉⲛⲧⲁϥⲧⲁⲙⲓⲟϥ ⲉⲓ ⲉⲧⲟⲟⲧϥ ⲙⲡⲥⲁⲉⲓⲛ 16 ⲣⲓⲙⲉ ⲉϫⲛ ⲟⲩⲕⲱⲱⲥ ⲛⲅⲁⲣⲭⲓ ⲛⲧⲟⲉⲓⲧ ⲛⲑⲉ ⲙⲡⲉⲧⲙⲟⲕϩ ⲉⲙⲁⲧⲉ ⲁⲩⲱ ⲛⲅⲗⲡⲉϥⲥⲱⲙⲁ ⲕⲁⲧⲁ ⲧⲉϥⲙⲓⲛⲉ ⲁⲩⲱ ⲙⲡⲣⲟⲃϣⲕ ⲉⲧⲉϥⲕⲁⲉⲓⲥⲉ 17 ⲁⲣⲓⲟⲩⲣⲓⲙⲉ ⲉϥⲛⲁϣⲧ ⲛⲅⲧⲁϣⲉⲟⲩⲛⲉϩⲡⲉ ⲛⲅⲣⲡⲉϥϩⲏⲃⲉ ⲕⲁⲧⲁ ⲡⲉϥⲙⲡϣⲁ ⲟⲩϩⲟⲟⲩ ϣⲁ ⲥⲛ[ⲁⲩ] ⲁⲩⲱ ⲛⲅⲥⲗⲥⲱⲗ […] 18 ϣⲁⲣⲉⲡⲙⲟⲩ ⲅⲁⲣ ϣⲱⲡⲉ ⲉⲧⲃⲉ ⲧⲗⲩ[ⲡⲏ] ⲁⲩⲱ ϣⲁⲣⲉⲧⲗⲩⲡⲏ ⲕⲱⲗϫ ⲛⲧϭⲟⲙ ⲙⲫⲏⲧ 19 ⲉϣⲁⲣⲉⲧⲗⲩⲡⲏ ⲟⲩⲱϩ ϩⲛ ϩⲉⲛϩⲓⲥⲉ ⲁⲩⲱ ⲧϭⲓⲛⲱⲛϩ ⲙⲫⲏⲕⲉ ϩⲙ ⲡⲉϥϩⲏⲧ 20 ⲙⲡⲣϯⲡⲉⲕϩⲏⲧ ⲉⲩⲗⲩⲡⲏ ⲥⲁϩⲱⲥ ⲉⲃⲟⲗ ⲙⲙⲟⲕ ⲉⲁⲕⲣⲡⲙⲉⲉⲩⲉ ⲛⲧⲉⲕϩⲁⲏ 21 ⲙⲡⲣⲣⲡⲱⲃϣ ⲙⲛⲑⲉ ⲅⲁⲣ ⲉⲧⲣⲉϥⲕⲟⲧϥ ⲉⲣⲟⲕ ⲁⲩⲱ ⲕⲛⲁϯϩⲏⲩ ⲁⲛ ⲙⲡⲁⲓ ⲁⲩⲱ ⲕⲛⲁⲑⲙⲕⲟⲕ 22 ⲁⲣⲓⲡⲙⲉⲉⲩⲉ ⲙⲡⲁϩⲁⲡ ϫⲉ ⲧⲁⲓ ⲧⲉ ⲑⲉ ⲙⲡⲱⲕ ⲁⲥϣⲱⲡⲉ ⲙⲙⲟⲓ ⲛⲥⲁϥ ⲁⲩⲱ ⲙⲙⲟⲕ ⲙⲡⲟⲟⲩ 23 ϩⲙ ⲡⲉⲛⲕⲟⲧⲕ ⲛⲟⲩⲕⲱⲱⲥ ⲙⲁⲧⲁⲗϭⲉⲡⲉϥⲣⲡⲙⲉⲉⲩⲉ ⲁⲩⲱ ⲛⲅⲥⲗⲥⲱⲗⲕ ⲉϫⲱϥ ϩⲙ ⲡⲓ ⲉⲃⲟⲗ ⲙⲡⲉϥⲡ︤ⲛ︦ⲁ︥ 24 ⲉⲣⲉⲧⲥⲟⲫⲓⲁ ⲛⲟⲩⲅⲣⲁⲙⲙⲁⲧⲉⲩⲥ ϩⲛ ⲟⲩⲟⲩⲟⲉⲓϣ ⲛⲥⲣϥⲉ ⲁⲩⲱ ⲡⲉⲧⲉⲣⲉⲛⲉϥϩⲃⲏⲩⲉ ⲥⲟⲃⲕ ⲛⲧⲟϥ ⲡⲉⲧⲛⲁⲣⲥⲟⲫⲟⲥ 25 ⲉϥⲛⲁⲣⲥⲟⲫⲟⲥ ϩⲛ ⲟⲩ ⲛϭⲓ ⲡⲉⲧⲁⲙⲁϩⲧⲉ ⲛⲟⲩϩⲃⲃⲉ ⲉϥϣⲟⲩϣⲟⲩ ⲙⲙⲟϥ ϩⲙ ⲡϣⲉ ⲙⲡⲉϥϫⲟⲕⲉϥ [………]ⲏⲕ ϩⲛ ⲛⲉϥ[ϩ]ⲃⲏⲩⲉ [ⲁⲩⲱ] ⲡⲉϥϣⲁϫⲉ […] ϩⲛ ⲡϣⲏⲣⲉ ϩⲱ ⲛⲙⲙⲁⲥⲉ 26 [ϥⲛⲁϯ] ⲙⲡⲉϥϩⲏⲧ ⲉⲩⲥⲟⲟⲩⲧⲛ ⲙⲡⲉϥⲧⲗⲟⲙ [ⲁ]ⲩⲱ ⲧⲉϥⲟⲩϣⲏ ⲛⲣⲟⲉⲓⲥ ⲡⲉ ϯϩⲣⲉ ⲛⲛⲉϥⲃⲁϩⲥⲉ 27 [ⲧ]ⲁⲓ ⲧⲉ ⲑⲉ ⲛϩⲁⲙϣⲉ ⲛⲓⲙ ϩⲓ ⲁⲣⲭⲓⲧⲉⲕⲧⲱⲛ ⲛⲓⲙ ⲡⲁⲓ ⲉϯⲣⲉ ⲛⲧⲉⲩϣⲏ ⲛⲑⲉ ⲙⲡⲉϩⲟⲟⲩ ⲛⲉⲧϣⲟϫⲧ ⲛϩⲛⲕⲗⲩⲙⲁ ⲛⲥⲫⲣⲁⲅⲓⲥ ⲁⲩⲱ ⲧⲉϥϩⲩⲡⲟⲙⲟⲛⲏ ⲡⲉ ϣⲓⲃⲉ ⲛⲁⲩⲁⲛ ϥⲛⲁϯ ⲙⲡⲉϥϩⲏⲧ ⲉⲩⲉⲓⲛⲉ ⲛⲍⲱⲅⲣⲁⲫⲓⲁ ⲁⲩⲱ ⲧⲉϥⲟⲩϣⲏ ⲛⲣⲟⲉⲓⲥ ⲡⲉ ϫⲉⲕⲡⲉϥϩⲱⲃ ⲉⲃⲟⲗ 28 ⲧⲁⲓ ⲧⲉ ⲑⲉ ⲛϩⲁⲙⲕⲗⲗⲉ ⲛⲓⲙ ⲉϥϩⲙⲟⲟⲥ ϩⲁⲧⲏ ⲡⲉⲙⲏϣ ⲉϥϯ ⲛϩⲧⲏϥ ⲉⲫⲱⲃ ⲙⲡⲡⲉⲛⲓⲡⲉ ⲡⲗϩⲱⲃ ⲙⲡⲕⲱϩⲧ ⲛⲁⲃⲗⲛⲉϥⲕⲁⲁⲥ ⲉⲃⲟⲗ ⲁⲩⲱ ⲉϥⲛⲁϯ ⲙⲛ ⲑⲙⲙⲉ ⲙⲡⲁϣ ⲡⲉϩⲣⲟⲟⲩ ⲙⲫⲁⲧⲏⲣ ⲛⲁⲧⲙⲧⲙ ⲛⲉϥⲙⲁⲁϫⲉ ⲉⲣⲉⲛⲉϥⲃⲁⲗ ϯ ⲛϩⲧⲏⲩ ⲉⲡⲓⲛⲉ ⲙⲡⲉϥϩⲛⲁⲁⲩ ϥⲛⲁϯ ⲙⲡⲉϥϩⲏⲧ ⲉϫⲉⲕⲛⲉϥϩⲃⲏⲩⲉ ⲉⲃⲟⲗ ⲁⲩⲱ ⲧⲉϥⲟⲩϣⲏ ⲛⲣⲟⲉⲓⲥ ⲡⲉ ⲧⲥⲁⲛⲟ ⲛⲧⲉⲩⲉⲙⲏ 29 ⲧⲁⲓ ⲧⲉ ⲑⲉ ⲙⲡⲕⲉⲣ[ⲁⲙⲉⲩⲥ ⲉϥϩⲙⲟⲟⲥ ⲉ]ⲡⲉϥϩⲱⲃ ⲉϥⲕⲧⲟ ⲙⲡⲉϥⲧⲣⲟⲭⲟⲥ ⲛⲛⲉϥⲟ[ⲩⲉⲣⲏⲧⲉ] ⲡⲁⲓ ⲉⲧϥⲓⲣⲟⲟⲩϣ ⲛⲟⲩⲟⲉⲓϣ ⲛⲓⲙ ⲙ[ⲡⲉϥ]ϩⲱⲃ ⲁⲩⲱ ⲉⲣⲉⲧⲉϥⲉⲓⲟⲡⲉ ⲧⲏⲣⲥ ϩⲛ ⲟⲩⲱ[ⲡ] 30 ϥⲛⲁϯⲥⲙⲟⲧ ⲉⲡⲟⲙⲉ ϩⲛ ⲛⲉϥϭⲃⲟⲉ[ⲓ] ⲁⲩⲱ ϥⲛⲁⲕⲱⲗϫ ⲛⲧⲉϥϭⲟⲙ ϩⲁ ⲛⲉϥⲟⲩⲉⲣⲏⲧⲉ ϥⲛⲁϯ ⲙⲡⲉϥϩⲏⲧ ⲉϫⲉⲕⲧⲧⲁϩⲥ ⲉⲃⲟⲗ ⲁⲩⲱ ⲧⲉϥⲟⲩϣⲏ ⲛⲣⲟⲉⲓⲥ ⲡⲉ ⲧⲃⲃⲟ ⲛⲧⲉϥϩⲣⲱ 31 ⲉⲣⲉⲛⲁⲓ ⲧⲏⲣⲟⲩ ⲕⲱ ⲛϩⲧⲏⲩ ⲉⲛⲉⲩϭⲓϫ ⲁⲩⲱ ⲉⲣⲉⲡⲟⲩⲁ ⲡⲟⲩⲁ ⲛⲁⲣⲥⲟⲫⲟⲥ ϩⲙ ⲡⲉϥϩⲱⲃ 32 ⲙⲛⲡⲟⲗⲓⲥ ⲛⲁϭⲱⲣϭ ⲁϫⲛⲧⲟⲩ ⲁⲩⲱ ⲛⲛⲉⲩⲟⲩⲱϩ ⲛϩⲏⲧⲥ ⲟⲩⲇⲉ ⲛⲛⲉⲩⲙⲟⲟϣⲉ 33 ⲛⲛⲉⲩϫⲓⲥⲉ ⲙⲙⲟⲟⲩ ϩⲛ ⲟⲩⲙⲏⲏϣⲉ ⲛⲛⲉⲩϩⲙⲟⲟⲥ ϩⲓ ⲧⲟϭⲥ ⲛⲣⲉϥϯϩⲁⲡ ⲁⲩⲱ ⲛⲉⲩⲙⲉⲕⲙⲟⲩⲕⲟⲩ ⲉⲩⲇⲓⲁⲑⲏⲕⲏ ⲛϩⲁⲡ ⲟⲩⲇⲉ ⲛⲉⲩⲟⲩⲱⲛϩ ⲉⲃⲟⲗ ⲛⲟⲩⲥⲃⲱ ⲙⲛ ⲟⲩⲕⲣⲓⲙⲁ ⲁⲩⲱ ⲛⲉⲩϩⲉ ⲉⲣⲟⲟⲩ ϩⲛ ϩⲉⲛⲡⲁⲣⲁⲃⲟⲗⲏ 34 ⲁⲗⲗⲁ ⲉⲩⲛⲁⲧⲁϫⲣⲟ ⲛⲛⲉⲩⲥⲱⲛⲧ ⲛϣⲁⲉⲛⲉϩ [ⲁⲩⲱ ⲡⲉⲩⲥⲟ]ⲡⲥ ϩⲛ ⲧⲉⲣⲅⲁⲥⲓⲁ ⲛ[ⲟⲩⲧ]ⲉⲭⲛⲏ [ⲡⲗⲏⲛ] ⲡⲉⲧⲛⲁϯ ⲙⲙⲁⲧⲉ ⲛⲧⲉϥⲯⲩⲭⲏ [ⲁⲩ]ⲱ ⲛϥⲙⲉⲉⲩⲉ ϩⲙ ⲡⲛⲟⲙⲟⲥ ⲙⲡⲉⲧϫⲟⲥⲉ 35